Navoiyda IIV JXD YHXX hamda viloyat IIB rahbari ishtirokida viloyatda sodir bo‘lgan YTHlar va ularni oldini olish maqsadida amalga oshirilgan chora-tadbirlar yuzasidan tanqidiy yig‘ilish o‘tkazildi
Navoiy viloyati IIBda o‘tkazilgan mazkur tanqidiy yig‘ilishda joriy yilning o‘tgan davri mobaynida viloyat hududida sodir etilgan yo‘l-transport hodisalari tahlil qilinib, ularning kelib chiqish sabablari atroflicha muhokama qilindi. Unda IIV JXD Yo‘l harakati xavfsizligi xizmati rahbari, viloyat IIB rahbariyati, shahar va tuman IIB boshliqlari, shuningdek sohaviy xizmatlar mas’ullari ishtirok etdi.
Yig‘ilishda ta’kidlanganidek, hududlarda haydovchilar tomonidan belgilangan tezlikka amal qilmaslik hamda piyodalarning yo‘l harakati qoidalariga rioya etmasligi oqibatida yo‘l-transport hodisalari kuzatilmoqda. Shu munosabat bilan mas’ul xodimlarning faoliyati tanqidiy ko‘rib chiqilib, har bir holat yuzasidan aniq vazifa va topshiriqlar belgilab berildi.
Yig‘ilish davomida avariya o‘choqlari mavjud hududlarda profilaktik tadbirlarni kuchaytirish, yo‘l infratuzilmasini yaxshilash, zamonaviy foto va video qayd etish moslamalarini ko‘paytirish, ta’lim muassasalarida yo‘l harakati qoidalari bo‘yicha targ‘ibot ishlarini yanada kuchaytirish masalalari yuzasidan takliflar ilgari surildi.
Shuningdek, xodimlar xizmat faoliyatini samarali tashkil etishi, xususan, tungi vaqtda nazoratni yanada kuchaytirish orqali yo‘l harakati xavfsizligini ta’minlash ustuvor vazifalardan biri ekani alohida ta’kidlandi.
Yig‘ilish yakunida mas’ul xodimlarga yo‘l-transport hodisalarining oldini olish, harakat xavfsizligini ta’minlash borasida qat’iy chora-tadbirlarni amalga oshirish yuzasidan tegishli topshiriqlar berildi.