Toshkent shahrining Chilonzor tumanida fuqarolar uchun xavfsiz va qulay muhitni shakllantirish, yo‘l harakati xavfsizligini ta’minlash hamda mavjud muammolarni joyiga chiqib o‘rganish maqsadida Yo‘l harakati xavfsizligi xizmati rahbariyati tomonidan tizimli o‘rganish ishlari olib borilmoqda.

O‘rganishlar davomida tumanda joylashgan muhim obyektlar va aholi gavjum hududlarda yo‘l harakati xavfsizligi bilan bog‘liq holatlar tahlil qilindi. Jumladan, tuman hududidagi avtovokzal faoliyati o‘rganilib, yo‘lovchi tashish bilan shug‘ullanayotgan haydovchilar bilan profilaktik suhbatlar o‘tkazildi. Uchrashuvlarda haydovchilarga yo‘l harakati qoidalariga qat’iy amal qilish, transport vositalarini texnik soz holatda boshqarish hamda yo‘lovchilar xavfsizligini ta’minlash masalalari yuzasidan tushuntirishlar berildi.

Shuningdek, tuman hududida faoliyat yuritayotgan avtomobillarni ro‘yxatdan o‘tkazish va diagnostika markazida ham o‘rganish ishlari olib borildi. Unda transport vositalarining texnik ko‘rikdan o‘tkazilish jarayonlari, xavfsizlik talablariga rioya etilishi va haydovchilar uchun yaratilgan sharoitlar ko‘zdan kechirildi. Mutasaddilarga transport vositalarining texnik sozligini ta’minlash yo‘l-transport hodisalarining oldini olishda muhim omil ekani alohida ta’kidlandi.

O‘rganishlar doirasida Chilonzor tumanidagi 202-sonli umumta’lim maktabida tashkil etilgan “Yo‘l harakati qoidalarini o‘rgatish sinfxonasi” ham ko‘zdan kechirildi. Maktab o‘quvchilari bilan yo‘l harakati qoidalariga rioya qilish, yo‘llarni kesib o‘tish madaniyati, piyodalar xavfsizligi kabi masalalarda tushuntirish ishlari olib borildi. Yoshlar o‘rtasida yo‘l harakati madaniyatini shakllantirish kelgusida sodir bo‘lishi mumkin bo‘lgan ko‘ngilsiz hodisalarning oldini olishda muhim ahamiyat kasb etishi qayd etildi.

Bundan tashqari, tumandagi avtoshohbekatlarda (pitak) ham haydovchilar bilan ochiq muloqot va profilaktik uchrashuvlar tashkil etildi. Uchrashuv davomida haydovchilarga harakat xavfsizligi qoidalariga amal qilish, tezlik me’yorlarini buzmaslik, piyodalar va boshqa yo‘l harakati ishtirokchilariga nisbatan hurmat bilan munosabatda bo‘lish zarurligi haqida tavsiyalar berildi.

Jarayonlarda poytaxt hududidagi masjidlar atrofidagi yo‘l harakati xavfsizligi holatiga ham alohida e’tibor berildi. Ayniqsa juma namozi hamda Ramazon oyi munosabati bilan taroveh namozlari vaqtida fuqarolar va transport vositalari harakati keskin ortishi inobatga olinib, ushbu hududlarda xavfsizlik choralariga alohida e’tibor qaratildi.

Masjidlar oldidagi piyodalar o‘tish joylari, avtomobillarni to‘xtash tartibi hamda yo‘l belgilari holati ko‘zdan kechirildi. Haydovchilarga transport vositalarini tartibli joylashtirish, piyodalarga esa yo‘l harakati qoidalariga amal qilish bo‘yicha tushuntirish ishlari olib borildi. Mazkur tadbirlar fuqarolar xavfsizligini ta’minlashga qaratilgani bilan ahamiyatlidir.

Mazkur o‘rganishlar davomida aniqlangan ayrim kamchiliklar yuzasidan tegishli mas’ullarga zarur ko‘rsatmalar berilib, yo‘l harakati xavfsizligini yanada mustahkamlash, fuqarolar uchun xavfsiz muhit yaratish borasida ishlarni izchil davom ettirish belgilab olindi.