Yo‘llarda bolalar xavfsizligini ta’minlash maqsadida amalga oshirilayotgan ishlar hamda yo‘l qo‘yilayotgan kamchiliklarga bag‘ishlangan tanqidiy yig‘ilish o‘tkazildi
IIV JXD Yo‘l harakati xavfsizligi xizmati hamda Maktabgacha va maktab ta’limi vazirligi tomonidan bolalar xavfsizligini ta’minlashga qaratilgan kengaytirilgan tanqidiy yig‘ilish bo‘lib o‘tdi.
Unda respublika hududida "Yo‘llarda xavfsiz bolalik" tamoyili asosida amalga oshirilayotgan profilaktik chora-tadbirlar, ta’lim muassasalari atrofida yo‘l infratuzilmasini yaxshilash, bolalarda yo‘l harakati madaniyatini shakllantirish borasida olib borilayotgan ishlar tahlil qilindi.
O‘zbekiston Respublikasi Prezidentining PQ-316-son qarori bilan tasdiqlangan "Xavfsiz va ravon yo‘l" umummilliy dasturi doirasida respublikadagi 7 mingdan ortiq maktablarda yo‘l harakati sinfxonalari, 5 mingga yaqin maktabgacha ta’lim tashkilotlarida maxsus maydonchalar tashkil etildi. Shuningdek, ta’lim muassasalari atrofida minglab tezlik cheklovchi yo‘l belgilari, qavariq piyodalar o‘tish joylari va 172 ta tugmali svetoforlar o‘rnatildi.
Yig‘ilishda bolalarni tashish bilan bog‘liq qoidalarga rioya etilmayotgani, ayrim ta’lim muassasalari tomonidan xavfsizlik talablariga zid ravishda yengil avtomobillarda bolalarni tashish holatlari saqlanib qolayotgani keskin tanqid qilindi.
Xususan, joriy yilning o‘tgan davrida voyaga yetmagan yo‘lovchilarni tashish bilan bog‘liq 598 ta qoidabuzarlik aniqlangani, ayrim holatlarda haydovchilarda tegishli toifadagi haydovchilik guvohnomasi mavjud emasligi, transport vositalari esa bolalarni tashish talablariga mutlaqo javob bermasligi aniqlangan.
Shuningdek, Navoiy viloyati Nurota tumanida xususiy bog‘cha tarbiyalanuvchilari ishtirokida sodir bo‘lgan ayanchli yo‘l-transport hodisasi misolida mas’ullar, ta’lim muassasalari rahbarlari va ota-onalarning mas’uliyati yana bir bor eslatib o‘tildi.
Yig‘ilish davomida bolalar xavfsizligini ta’minlash bo‘yicha qator takliflar ilgari surildi. Jumladan, bolalarni tashish faoliyati uchun majburiy litsenziyalash tizimini joriy etish, transport vositalarini GPS va kuzatuv kameralari bilan jihozlash, yengil avtomobillarda bolalar tashishni qat’iy cheklash, raqamli nazorat platformasini ishga tushirish hamda sohada javobgarlik choralarini kuchaytirish zarurligi ta’kidlandi.
Yig‘ilish yakunida mutasaddi tashkilotlar hamda hududiy mas’ullarga bolalarning yo‘llardagi xavfsizligini ta’minlash, profilaktik tadbirlar samaradorligini oshirish va mavjud muammolarni bartaraf etish yuzasidan tegishli topshiriqlar berildi.