Dastlabki ma’lumotlarga ko‘ra, joriy yilning 6-sentabr kuni soat 16:40 larda, Jizzax viloyati, Gʻallaorol tumani hududidan o‘tgan M-39 avtomobil yo‘lining 1027-kilometrida, "Samarqand-Toshkent" yo‘nalishida harakatlanib ketayotgan haydovchi, 1985-yilda tug‘ilgan Sh.Gʻ. boshqaruvidagi "Kamaz" rusumli yuk avtomobilining gaz uskunasidagi nosozlik sabab yong‘in yuzaga kelgan.

Haydovchi avtomobilni zudlik bilan to‘xtatgan. Yong‘in o‘t o‘chiruvchilar tomonidan bartaraf etilgan. Hodisa natijasida tan jarohati olganlar yo‘q.

Mazkur hodisa yuzasidan Gʻallaorol tumani FVB hamda YHXB xodimlari tomonidan surishtiruv ishlari olib borilmoqda.

Barcha haydovchilardan boshqaruvidagi transport vositasining texnik sozligiga e’tiborli bo‘lishlarini so‘raymiz.