Oʻzbekiston Respublikasi Prezidentining 2020-yil 7-dekabrdagi “Davlat tomonidan tartibga solinadigan sohalarga xususiy sektorni jalb etish boʻyicha qoʻshimcha chora-tadbirlar toʻgʻrisida”gi PQ-4913-son qarori bilan avtomototransport vositalari va shahar elektr transporti vositalari haydovchilarini tayyorlash, qayta tayyorlash va ularning malakasini oshirish boʻyicha nodavlat taʼlim xizmatlari koʻrsatish faoliyati uchun litsenziyaga ega tadbirkorlik subyektlariga barcha toifadagi avtomototransport vositalarini (trolleybus va tramvaydan tashqari) boshqarish huquqini beruvchi haydovchilik guvohnomasini olish uchun nazariy va amaliy imtihonlarni oʻtkazish huquqi berildi.

Shunga asosan Vazirlar Mahkamasining 2021-yil 4-mayda 272-son “Avtomototransport vositalarini boshqarish huquqini beruvchi haydovchilik guvohnomalarini olish uchun imtihonlarni oʻtkazish sohasiga xususiy sektorni jalb etishga doir qoʻshimcha chora-tadbirlar toʻgʻrisida”gi qarori tasdiqlandi.

Ushbu qarorlarga muvofiq tadbirkorlik subyektlari tomonidan avtomatlashtirilgan avtodromlarni qurish ishlari boshlab yuborilgan va ayrim tadbirkorlik subyektlari tomonidan faoliyatni boshlashga tayyor ekanliklari maʼlum qilinmoqda. Bunga yaqqol misol tadbirkorlik subyekti tomonidan Toshkent shahar Sirgʻali tumanida barpo etilgan “Toshkent imtihon markazi”dir. Ushbu markaz joriy yilning 4-fevral kunidan oʻz faoliyatini boshlaydi.

“Toshkent imtihon markazi” oʻz faoliyatini boshlaganligi munosabati bilan Vazirlar Mahkamasining 2021-yil 4-maydagi 272-son qaroriga asosan joriy yilning 4-fevralidan Toshkent shahar IIBB YHXB Roʻyxatlash va imtihon olish boʻlim-boʻlinmalari haydovchilik guvohnomasini berish uchun nazariy va amaliy imtihonlarni qabul qilish faoliyatini toʻxtatadi. Shunga muvofiq endilikda fuqarolarimiz tomonidan Toshkent shahrida haydovchilik guvohnomasini olish yoki uni tiklash uchun imtihonlarni topshirish Sirgʻali tumanida joylashagan “Toshkent imtihon markazi” tomonidan amalga oshirilishini maʼlum qilamiz.