Oʻzbekiston Respublikasi Bosh prokuraturasi huzuridagi Iqtisodiy jinoyatlarga qarshi kurashish departamentining xabariga koʻra, Bosh prokuratura huzuridagi Departamentning Pop tuman boʻlimi tomonidan DXX xodimlari bilan hamkorlikda oʻtkazilgan tezkor tadbirda “T. Oʻ.” MCHJga qarashli avtomaktab oʻrgatuvchi-ustalari U.Sh., B.A. va J.D. fuqaro U.X.ga 1 300 AQSH dollari evaziga haydovchilik guvohnomasini olish uchun boʻlib oʻtadigan imtihonlarga qatnashmasdan haydovchilik guvohnomasini olib berishlarini aytib, shundan 500 AQSH dollari 1,2 mln soʻmni olgan vaqtlarida ashyoviy dalillar bilan ushlangan.

Xuddi shunday, Departamentning Zafarobod tuman boʻlimi tomonidan DXX xodimlari bilan hamkorlikda oʻtkazilgan tezkor tadbirda “O.Z.” MCHJga qarashli avtomaktab oʻrgatuvchi-ustasi R.S. fuqaro E.F.ga 1 000 AQSH dollari evaziga haydovchilik guvohnomasini olish uchun boʻlib oʻtadigan imtihonlarga qatnashmasdan haydovchilik guvohnomasini olib berishini aytib, oldindan 500 AQSH dollarini olgan vaqtida ashyoviy dalillar bilan ushlangan.

Shu kabi, Departamentning Xoʻjayli tuman boʻlimi tomonidan DXX xodimlari bilan hamkorlikda oʻtkazilgan tezkor tadbirda fuqaro T.J. fuqaro F.K.ni tanishlari yordamida haydovchilik guvohnomasini olish uchun boʻlib oʻtadigan imtihondan oʻtkazib qoʻyishi evaziga 6 mln soʻmni olgan vaqtida ashyoviy dalillar bilan ushlangan.

Departamentning Taxiatosh tuman boʻlimi tomonidan DXX va IIB xodimlari bilan hamkorlikda oʻtkazilgan tezkor tadbirlarda esa, fuqaro M.Sh. fuqaro S.T.ni haydovchilik guvohnomasini olish uchun boʻlib oʻtadigan imtihondan oʻtkazib qoʻyishi evaziga 550 AQSH dollarini hamda fuqarolar M.D., R.U. fuqaro M.B.ni tanishlari yordamida haydovchilik guvohnomasini olish uchun boʻlib oʻtadigan imtihondan oʻtkazib qoʻyishi evaziga 5 mln soʻmni olgan vaqtlarida ashyoviy dalillar bilan ushlangan.

Mazkur holatlar yuzasidan Jinoyat kodeksining 168-moddasi (firibgarlik) va 28, 211-moddasi (pora berish) bilan jinoyat ishlari qoʻzgʻatilib, tergov harakatlari oʻtkazilmoqda.