Bosh prokuratura huzuridagi Departamentning Quva tuman boʻlimi tomonidan DXX xodimlari bilan hamkorlikda oʻtkazilgan tezkor tadbirda fuqaro T.M. 2 nafar fuqaroni yuqori lavozimda ishlovchi tanishlari yordamida haydovchilik guvohnomasini olish uchun boʻlib oʻtadigan test sinovlaridan oʻtkazib qoʻyish evaziga 2 400 AQSH dollarini olgan vaqtida ashyoviy dalillar bilan ushlangan.

Shu kabi, Departament hamda DXXning Jizzax viloyati boshqarmalari tomonidan oʻtkazilgan tezkor tadbirda “Vatanparvar” tashkiloti Baxmal oʻquv-sport texnika klubi boshligʻi X.R. fuqaro Z.Z.ga haydovchilik guvohnomasini olib berish evaziga 300 AQSH dollari va 310 ming soʻmni olgan vaqtida ashyoviy dalillar bilan ushlangan. Oʻtkazilgan tergovga qadar tekshiruvda davomida X.R. “Sh.A” MCHJ avtomaktabi masʼul shaxslari bilan oʻzaro til biriktirib, 6 nafar fuqaroga avtomaktabda oʻqiganligi haqida sohta hujjat rasmiylashtirib berganligi aniqlangan.

Mazkur holatlar yuzasidan Jinoyat kodeksining 168-moddasi (firibgarlik) va 228-moddasi (hujjatlar, shtamplar, muhrlar, blankalar tayyorlash, ularni qalbakilashtirish, sotish yoki ulardan foydalanish) bilan jinoyat ishlari qoʻzgʻatilib, tergov harakatlari oʻtkazilmoqda.