Toshkent viloyatining poytaxtga tutash qismida, Qibray tumanida barpo etilgan "Yangi O‘zbekiston" bog‘ida Mustaqilligimizning 30 yilligi munosabati bilan bayram tadbirlari tashkil etilishi rejalashtirilgan.

Shu munosabat bilan, 2021-yil 31-avgust hamda 1-2 sentаbr kunlari mazkur bog‘ atrofida, Temur Malik hamda Ohangaron shoh ko‘chalari kesishmasidan boshlab "Maxtumquli-Istiqlol" avtomobil yo‘li bo‘ylab 4R-12 "Bektemir-Chorbog‘" avtomobil yo‘ligacha bo‘lgan masofada transport vositalari harakati cheklanishi mumkin.

Tirbandliklarni oldini olish maqsadida haydovchilarga boshqa aylanma yo‘llardan foydalanishlari tavsiya etiladi.

Barcha haydovchilardan bayram tadbirlari vaqtida tartibga soluvchilarning ishoralari hamda yo‘l belgilari talablariga rioya qilishlarini so‘raymiz.