Oʻzbekiston Respublikasi Bosh prokuraturasi huzuridagi Iqtisodiy jinoyatlarga qarshi kurashish departamentining xabariga koʻra, Bosh prokuratura huzuridagi Departamentning Vobkent tumani boʻlimi, viloyat IIB xodimlari bilan hamkorlikda oʻtkazilgan tezkor tadbirda fuqarolar Sh.A., I.I. va M.R. fuqaro I.I. ni haydovchilik guvohnomasi olishi uchun boʻladigan imtihondan oʻtkazib qoʻyish evaziga 400 AQSH dollarini olgan vaqtlarida ashyoviy dalillar bilan ushlanganlar.

Departamentning Koson tuman boʻlimi tomonidan oʻtkazilgan tergovga qadar tekshiruvda, fuqaro N.X. fuqaro A.P. ni haydovchilik guvohnomasi olishi uchun boʻladigan imtihondan goʻyoki Ichki ishlar organlarida ishlovchi tanishi yordamida oʻtkazib qoʻyish evaziga 2,2 mln soʻmini qoʻlga kiritganligi aniqlanib, shundan 2 mln soʻmni qaytarganligi protsessual tartibda rasmiylashtirilgan.

Departamentning Qoraqalpogʻiston Respublikasi boshqarmasi tomonidan IIV xodimlari bilan hamkorlikda oʻtkazilgan tezkor tadbirda, fuqaro B.Sh. fuqaro S.K. ni haydovchilik guvohnomasi olish uchun boʻladigan imtihondan tanishlari yordamida oʻtkazib qoʻyish evaziga 2 mln soʻmni olgan vaqtida ashyoviy dalillar bilan ushlangan.

Mazkur holatlar yuzasidan Jinoyat kodeksining 168-moddasi (firibgarlik) va 28, 211-moddasi (pora berish) bilan jinoyat ishlari qoʻzgʻatilib, tergov harakatlari oʻtkazilmoqda.