Sirdaryo viloyati IIB Axborot xizmatining xabariga koʻra, 2022-yil 21-aprel kuni Oʻzbekiston Respublikasi IIV SHXBB Sirdaryo viloyati boʻyicha boʻlimi, Bosh prokuratura huzuridagi Iqtisodiy jinoyatlarga qarshi kurashish departamentining Sirdaryo viloyati boʻyicha boshqarmasi xodimlari hamda Sirdaryo viloyati IIB xodimlari bilan hamkorlikda Oqoltin tumani IIB JXX Yoʻl harakati xavfsizligi guruhi maʼmuriy binosida tezkor tadbir oʻtkazilgan.

Tezkor tadbir davomida, 1992-yilda Qashqadaryo viloyatida tugʻilgan fuqaro Gʻ.B. YHXG xodimi J.Xolboʻtayevga avtomobilini jarima maydonidan chiqarib berish va maʼmuriy bayonnomani yengilroq huquqbuzarlik boʻyicha oʻzgartirib berish evaziga xodim tomonidan bir necha marotaba ogohlantirilishiga qaramasdan, maʼmuriy binoning oshxonasida 935.000 (toʻqqiz yuz oʻttiz besh ming) soʻm miqdoridagi pulni pora tariqasida bergan vaqtida tadbir ishtirokchilari tomonidan daliliy ashyo bilan ushlangan.

Mazkur holat yuzasidan fuqaro Gʻ.B.ga nisbatan Oʻzbekiston Respublikasi JKning 211-moddasi 1-qismi bilan jinoyat ishi qoʻzgʻatilib, hozirda dastlabki tergov harakatlari olib borilmoqda.