2022-yil 22-yanvar kuni soat 12:20 larda, Navoiy viloyati, Navbahor tumani hududidan oʻtuvchi A-379 avtomobil yoʻlining 3-kilometrida YPX xodimi D.Toshov tomonidan “Matiz” rusumli avtomobil haydovchisi toʻxtatilgan. Tekshiruv davomida haydovchi yoʻlovchi tashish faoliyati bilan shugʻullanishi, uning yonida kunlik yoʻl varaqasi mavjud emasligi maʼlum boʻlgan. Shundan soʻng, YPX xodimi tomonidan haydovchiga nisbatan maʼmuriy bayonnoma tuzilib, avtomobil vaqtincha saqlash uchun jarima maydoniga olib ketilayotgan vaqtda, haydovchi, 1993-yilda tugʻilgan A.T. YPX xodimiga faol qarshilik koʻrsatgan va tortishuvli vaziyat yuzaga kelgan.

Holat sodir boʻlgan joyga tuman IIB tezkor-tergov guruhi va prokuratura xodimlari chiqib, tegishli hujjatlar rasmiylashtirilgan.

YPX xodimining oʻz xizmat vazifasini bajarishiga qarshilik koʻrsatib, turli uyatli soʻzlar bilan haqoratlagan fuqaro A.T. ga nisbatan Navbahor tuman prokuraturasi tomonidan Oʻzbekiston Respublikasi Jinoyat Kodeksining 140-modda (haqorat qilish)si 3-qismi “a” bandi hamda 219-modda (hokimiyat vakiliga yoki fuqaroviy burchini bajarayotgan shaxsga qarshilik koʻrsatish)si 2-qismi bilan jinoyat ishi qoʻzgʻatilib, ushbu fuqaro Oʻzbekiston Respublikasi Jinoyat Protsessual Kodeksining 221-moddasi tartibida ushlangan. Hozirda dastlabki tergov harakatlari olib borilmoqda.