Joriy yilning 30-avgust kuni soat 02:00 larda Toshkent shahar, Shayxontohur tumani hududida joylashgan "Ibn Sino" dehqon bozori yaqinida tungi xizmatda bo‘lgan YPX xodimi E.Xudoyberganov ko‘rinishidan mastlik alomati sezilgan, xatti-harakatlari shubxali bo‘lgan ayol kishi "Matiz" rusumli avtomobilni boshqarmoqchi bo‘lganligiga e’tibor qaratgan.

Boshqaruvida bo‘lgan "Lacetti" rusumli xizmat avtomobilini yo‘l chetiga to‘xtatib, ushbu ayol kishi bilan muloqot qilgan. Muloqot davomida fuqaro D.T.ni mastlik holatida gumonlagan va transport vositasini boshqarmoqchi bo‘lgan vaqtda xodim ko‘ngilsiz hodisa sodir bo‘lishini inobatga olib, boshqarishiga yo‘l qo‘ymagan.

Shundan so‘ng, fuqaro D.T. turli so‘zlar bilan xodimni haqorat qilgan. Xodim vazminlik bilan oila a’zosi yoki tanishi kelib olib ketmaguncha avtomobilni boshqarishiga yo‘l qo‘ymasligini ma’lum qilgan. Fuqaro farzandini chaqirgandan so‘ng, xodim o‘z xizmatini davom ettirgan.

Fuqaro D.T. jamoat joyida yurish-turish qoidalarini buzganligi, YPX xodimi E.Xudoyberganovni turli so‘zlar bilan haqorat qilganligi bo‘yicha tegishli hujjatlar to‘planib, o‘rganib chiqishlik uchun jinoyat ishlari bo‘yicha Shayxontohur tumani sudiga yuborish choralari ko‘rilmoqda. Shuningdek, video lavha ijtimoiy tarmoqda tarqalib ketishi holati o‘rganilmoqda.