Ijtimoiy tarmoqda "Malibu" rusumli 01 010VSG davlat raqam belgili maxsus xizmat avtomobili bo‘yicha o‘z muddatida bartaraf qilinmagan 11 ta qarzdorlik holatlari keltirilgan xabar tarqaldi.

Holat yuzasidan Toshkent viloyati IIBB YHXB mas’ul xodimlari tomonidan surishtiruv o‘tkazildi. Surishtiruvga ko‘ra, ushbu avtomobil bilan bog‘liq bo‘lgan, 2 ta holatda sodir etilgan qoidabuzarlik holatlari yuzasidan jarimalar o‘rnatilgan tartibga ko‘ra undirish choralari ko‘rildi.

Shuningdek, 9 ta holatdagi belgilangan jarimalar bo‘yicha viloyat IIBB YHXB navbatchilik qismining qayd etish kitobi bilan solishtiruvlarga ko‘ra, kechiktirib bo‘lmas vazifalarni bajarish, kuzatuv ishlarini amalga oshirish jarayonida qayd etilganligi ma’lum bo‘ldi.

O‘zbekiston Respublikasi Ma’muriy javobgarlik to‘g‘risidagi Kodeksning 17 prim 1 moddasining beshinchi xatboshisi (Tezkor va maxsus xizmatlarning transport vositalari, shuningdek ular kuzatib kelayotgan transport vositalari tomonidan yo‘l harakati qoidalariga muvofiq imtiyozdan foydalangan holda sodir etilgan ma’muriy huquqbuzarliklar maxsus foto- va video qayd etishning avtomatlashtirilgan texnik vositalari orqali qayd etilgan taqdirda hamda kechiktirib bo‘lmaydigan xizmat vazifalarini bajarganlikni tasdiqlovchi hujjatlar taqdim etilganda haydovchilarning ma’muriy qoidabuzarligi oxirgi zarurat holatlarida sodir etilgan deb topiladi va ma’muriy ish ushbu Kodeksning 271-moddasiga muvofiq tugatiladi) hamda 271-moddasi birinchi xatboshisining to‘rtinchi kichik bandiga muvofiq mazkur 9 ta qoidabuzarlik bo‘yicha qarorlar bekor qilindi.

Ushbu keltirib o‘tilgan "Malibu" rusumli, 01 010VSG davlat raqam belgili avtomobil maxsus transport vositasi ekanligi, tezkor, kechiktirib bo‘lmas vaziyatlarda yo‘l harakati xavfsizligini ta’minlash sharti bilan Qoidalarning VII bob (38-bandidan tashqari), IX — XVI, XIX–XX boblari, 1 va 2-ilovalari talablaridan chetga chiqishga ruxsat berilishini inobatga olish maqsadga muvofiqdir.