Ijtimoiy tarmoqda qora rangli, “Lacetti” rusumli ikki transport vositalarining haydovchilari yo‘l harakati qoidalarini qo‘pol tarzda buzib harakatlanib yurganligi aks etgan video tarqaldi va keng jamoatchilik muhokamalariga sabab bo‘ldi.

Videoda aks etgan holat Farg‘ona viloyati IIB YHXB xodimlari tomonidan o‘rganilib, “Lacetti” rusumli, 40 T007TA davlat raqam belgili avtomobil haydovchisi, Qo‘qon shahrida yashovchi, 1997-yilda tug‘ilgan R. R. va 40 E234NA davlat raqam belgili yana bir "Lacetti" rusumli avtomobil haydovchisi, Qo‘qon shahrida yashovchi, 2000-yilda tug‘ilgan M. S. ekanligi aniqlandi.

“Lacetti” rusumli 40 T007TA davlat raqam belgili avtomobil haydovchisi R. R. ga nisbatan O‘zbekiston Respublikasi Ma’muriy javobgarlik to‘g‘risidagi Kodeksning 126-moddasi 2-qismi tartibida, 40 E234NA davlat raqam belgili “Lacetti” rusumli avtomobil haydovchisi M. S. ga nisbatan esa O‘zbekiston Respublikasi Ma’muriy javobgarlik to‘g‘risidagi Kodeksining 128⁵-moddasi 2-qismi tartibida ma’muriy bayonnoma rasmiylashtirildi.

Barcha haydovchilardan yo‘llarda qoidalarga rioya qilishlarini, yo‘l — o‘yin maydoni emasligini unutmasliklarini so‘raymiz.