Joriy yilning 30-iyul kuni Toshkent shahar, Uchtepa tumani, KXAY ko‘chasida joylashgan "Jahon tillari universiteti" binosi ro‘parasida IIBB sohaviy xizmatlari hamda "UzReport TV" telekanali xodimlari hamkorligida tungi vaqtda olib borilayotgan reyd davomida YPX xodimi tomonidan "Nexia-3" rusumli, 01 X 743 DB davlat raqam belgili avtomobil haydovchisiga to‘xtash ishorasi ko‘rsatilgan vaqtda haydovchi to‘xtamasdan harakatda davom etgan. Ko‘rilgan choralar natijasida avtomobil KXAY-Farxod ko‘chalari kesishmasida to‘xtatilgan.

YPX xodimi o‘zini tanishtirib, tegishli hujjatlarini taqdim qilishini so‘raganda haydovchi transport vositasini ro‘yxatdan o‘tkazilganligi haqidagi guvohnomasidan tashqari boshqa kerakli hujjatlarini taqdim qila olmagan. Ushbu jarayonda haydovchi, 1996-yilda tug‘ilgan M.E. va yo‘lovchi, 1999-yilda tug‘ilgan U.E. vaziyatdan chiqib ketish maqsadida turli savol va harakatlar bilan xodimning hamda telekanal operatorlarining faoliyatiga xalaqit bergan. Holat 40 daqiqa davom etib, haydovchi va yo‘lovchi jamoat joyida janjal ko‘targan va xizmat olib borayotgan xodimlarga nisbatan haqoratli so‘zlar ishlatib nosamimiy munosabatda bo‘lgan. Ko‘rilgan choralar natijasida haydovchi va yo‘lovchi hududiy IIBga olib borilib, YPX xodimi N.Dosimov tomonidan haydovchi M.E.ga nisbatan O‘zbekiston Respublikasi Ma’muriy javobgarlik to‘g‘risidagi Kodeksning 135-moddasi 2-qismi hamda 194-moddasi 1-qismi, yo‘lovchi U.E.ga nisbatan esa 194-moddasi 1-qismi tartibida ma’muriy bayonnoma tuzilib, transport vositasi vaqtincha saqlash uchun jarima maydoniga joylashtirilgan.

2021-yil 30-iyul kuni Jinoyat ishlari bo‘yicha Uchtepa tumani sudi tomonidan fuqaro M.E. hamda U.E.lar O‘zbekiston Respulikasi Ma’muriy javobgarlik to‘g‘risidagi Kodeksning 194-moddasi 1-qismida nazarda tutilgan huquqbuzarlikni sodir etganlikda aybli deb topilib, ularning har biriga BHMning ikkidan bir qismi, ya’ni 122.500 so‘m miqdorida jarima jazosi belgilangan. Shuningdek, Toshkent shahar IIBB YHXB ma’muriy materiallarni ko‘rib chiqishga mas’ul xodim tomonidan haydovchi M.E.ga nisbatan O‘zbekiston Respublikasi Ma’muriy javobgarlik to‘g‘risidagi Kodeksning 135-moddasi 2-qismi tartibida BHMning 5 baravari miqdorida jarima belgilangan.

O‘zbekiston Respublikasi IIV YHXBB Axborot xizmati