2022-yil 20-mart kuni Surxondaryo viloyati, Jarqoʻrgʻon tumani, “Kakaydi” qoʻrgʻonida xizmat olib borayotgan YPX xodimi E.Nurmatov tomonidan “Nexia” rusumli avtomobil toʻxtatilganda, oʻzaro muloqot jarayonida haydovchi A.S.ning ogʻzidan spirtli ichimlik hidi kelayotganligini xodim payqagan va uni tekshiruvdan oʻtishga taklif qilgan.

“Alkotester” moslamasining natijasiga koʻra, ushbu haydovchi spirtli ichimlikdan mast holdaligi tasdiqlangan. YPX xodimi tomonidan haydovchiga nisbatan Oʻzbekiston Respublikasi Maʼmuriy javobgarlik toʻgʻrisidagi Kodeksning 131-moddasi tartibida bayonnoma rasmiylashtirilib, avtomobili ushbu Kodeksning 291-moddasiga koʻra, vaqtincha saqlash uchun jarima maydoniga qoʻyilgan.

Haydovchi YPX xodimi E.Nurmatovdan tegishli chora koʻrmasligini soʻragan va evaziga 300 (uch yuz) AQSH dollari miqdorida pul berishni taklif qilgan.

Shundan soʻng, xodim Surxondaryo viloyati IIB boshligʻi nomiga bildirgi orqali murojaat qilib, pora taklif qilayotgan fuqaroga nisbatan qonuniy chora koʻrilishini soʻragan.

Holat yuzasidan 21-mart kuni soat 12:00 larda, huquqni muhofaza qiluvchi organ xodimlari tomonidan tezkor tadbir davomida, fuqaro A.S. YPX xodimiga 300 (uch yuz) AQSH dollari miqdoridagi pullarni pora tariqasida berayotgan vaqtda qoʻlga olingan.

Hozirda mazkur holat yuzasidan Jarqoʻrgʻon tumani prokuroturasi tomonidan tergovga qadar tekshiruv harakatlari olib borilmoqda.