IIV JXD Yo‘l harakati xavfsizligi xizmati rahbari "Qamchiq" dovonida amaliy tashrif bilan bo‘ldi. Dastlab YHXX rahbari "Chinor" YPX maskanida o‘rnatilgan kuzatuv kameralarining integratsiya holatini ko‘zdan kechirib, xodimlarning xizmat olib borish jarayoni bilan yaqindan tanishdi.

Shuningdek, “Qamchiqavtoyo‘l IYFK” DM hamda obodonlashtirish xizmati xodimlari bilan suhbat o‘tkazilib, mavjud maxsus texnikalarning texnik holati ko‘zdan kechirildi. Qishki mavsum uchun mo‘ljallangan qum-tuz aralashmasi zaxirasi yetarli ekanligi tekshirildi.

Tashrif davomida A-373 avtomobil yo‘lining 106–108-kilometrlari oralig‘ida olib borilayotgan ta’mirlash ishlari bilan tanishilib, yo‘l harakati xavfsizligini ta’minlashga qaratilgan chora-tadbirlar muhokama qilindi.

Shundan so‘ng, "Namangan" YPX maskanida yuk avtomobillarini ko‘rikdan o‘tkazish uchun mo‘ljallangan "rentgen" moslamasi hamda maskanda tashkil etilgan "qizil–yashil yo‘lak" tizimi faoliyati bilan tanishdi. Bundan tashqari, Ma’muriy amaliyot bo‘limida xizmat jarayonlari, xodimlar uchun yaratilgan shart-sharoitlar o‘rganilib, fuqarolar bilan suhbat o‘tkazildi.

Tashrif yakunida YHXX rahbari kuchaytirilgan xizmatga jalb etilgan shaxsiy tarkib ishtirokida yo‘riqnoma o‘tkazib, xizmatni hushyor va sergak holda olib borish, fuqarolar bilan xushmuomalada bo‘lish, qoidabuzarliklarning oldini olish, shuningdek, pirotexnika vositalarining noqonuniy aylanmasiga qarshi kurashish bo‘yicha aniq topshiriq va ko‘rsatmalar berdi.