Joriy yilning 3-aprel kuni Namangan viloyati IIB JXX YHXB majlislar zalida viloyat IIB boshligʻi polkovnik Shuxrat Aliyev huzurida yoʻl harakati xavfsizligi sohasida joriy yilning 3 oyi davomida amalga oshirilgan ishlar va yoʻl qoʻyilgan kamchiliklar muhokamasiga bagʻishlangan tezkor yigʻilish oʻtkazildi.

Unda Boshqarma boshligʻi oʻrinbosarlari, faxriylar, xizmat-soha rahbarlari, YHXB shaxsiy tarkibi ishtirok etdi.

Yigʻilishda sodir boʻlishi mumkin boʻlgan avtohalokatlarni barvaqt oldini olish, “Xavfsiz va ravon yoʻl” dasturi doirasida amalga oshirilgan ishlar, viloyat hududida namunali harakatni taʼminlash chora-tadbirlari, xizmat intizomi va qonuniylikka rioya etilishi hamda boshqa yoʻnalishlarda amalga oshirilgan ishlar tanqidiy tahlil qilindi.

Shuningdek, oʻz ishiga sovuqqonlik bilan qaragan xodimlarga nisbatan Boshqarma boshligʻi tomonidan qatʼiy choralar koʻrildi.

Tizimda mavjud muammolar oʻrtaga tashlanib, ularni bartaraf etish va samarali xizmat tashkil etish borasida masʼullarga lozim topshiriqlar berildi.

Koʻtarilgan muammolar va yechimini kutayotgan masalalar boʻyicha soha faxriylari ham oʻzlarining takliflarini bildirdilar.

Yigʻilish davomida xizmatga vijdonan munosabatda boʻlib, namunali faoliyati bilan hamkasblariga oʻrnak boʻlib kelayotgan bir guruh inspektorlar boshqarma boshligʻi tomonidan munosib ragʻbatlantirildi.

Bundan tashqari sohada uzoq yillar halol mehnat qilib, rahbarlik lavozimida faoliyat yuritgan podpolkovnik Fazliddin Uralov samimiy fikrlar va iliq tilaklar bilan tantanali ravishda isteʼfoga kuzatildi.

Shuningdek, viloyat IIB JXX YHXBga yangi tayinlangan rahbar podpolkovnik Sharof Islomov shaxsiy tarkibga tanishtirilib, tayinlovga qadar boshqarmada rahbarlik vazifasini vaqtincha bajarib, viloyat yoʻl harakati xavfsizligi sohasida yaxshi natijalarni koʻrsata olgan IIV JXD YHXX boshligʻining oʻrinbosari podpolkovnik Stanislav Kravchenkoga ham minnatdorchilik bildirildi.

Yigʻilish soʻnggida Boshqarma boshligʻi shaxsiy tarkib va xizmat-soha rahbarlariga bugungi muhokamadan kerakli xulosani olib, samarali va natijali ish tashkil etish va viloyat hududida yoʻl harakati bilan bogʻliq salbiy vaziyatlarni kamaytirish lozimligini alohida taʼkidladi.

Namangan viloyati IIB Axborot xizmati