Joriy yilning 10-iyun kunidan haydovchilik guvohnomasini olish uchun imtihon topshirish boʻyicha “Toshkent viloyati imtihon markazi” oʻz faoliyatini boshladi.
Sinov jarayonlari toʻliq avtomatlashtirilgan Toshkent viloyati Ohangaron tumanida joylashgan imtihon markazida Toshkent viloyati fuqarolari hamda boshqa viloyatlar fuqarolari ham ushbu imtihon markazida haydovchilik guvohnomasini olish uchun nazariy va amaliy imtihonlarni topshirishlari mumkin.
Markazda nazariy imtihonni topshirish uchun nomzodlarga 20 ta savol va 25 daqiqa vaqt ajratiladi. Bunda fuqaro savollardan kamida 18 tasiga toʻgʻri javob berishi kerak boʻladi. Nazariy imtihondan muvoffaqiyatli oʻtgan nomzodlarga amaliy imtihonlarni topshirishga ruxsat beriladi.
Amaliy imtihon jarayonlari toʻliq avtomatlashtirilgan boʻlib, nomzodning transport vositasini boshqarish koʻnikmalari avtomatlashtirilgan tizim orqali baholanib boriladi va jarayon masofadan kuzatiladi.
Imtihonlarning ikkala bosqichini muvaffaqiyatli topshirgandan soʻng, nomzodlarga sertifikat beriladi. Nomzodlar bu sertifikat bilan YHXBga yoki DXMga murojaat qilishlari lozim.
Sertifikat maʼlumotlar bazasida tekshirilganidan soʻng, ularga belgilangan tartibda haydovchilik guvohnomasi taqdim etiladi.