Bugun, 2024-yil 20-noyabr kuni soat 01:10 larda “Namangan” YPX maskanida YHXX “Qamchiq” dovoni boʻyicha YPX otryadi hamda boshqa sohaviy xizmatlarning xodimlari bilan oʻzaro hamkorlikda olib borilgan tadbir davomida “Toshkent-Vodiy” yoʻnalishida harakatlanib kelgan haydovchi, 1983-yilda tugʻilgan B.Y. boshqaruvidagi “Lacetti” rusumli avtomobil toʻxtatilganda, ushbu avtomobil salonida boʻlgan yoʻlovchilar, 1984-yilda tugʻilgan M.Yu. va 1987-yilda tugʻilgan R.A.lar turli xatti-harakatlari bilan xodimlarda shubha uygʻotishgan.

Xolis va guvohlar ishtirokidagi tekshiruv davomida yoʻlovchilarga tegishli sellofan paket ichidan 2 kilogrammdan ziyod oʻtkir hidli, jigarrangli koʻrinishidan giyohvandlik vositasiga oʻxshash modda topilgan.

Holat yuzasidan belgilangan tartibda hujjatlar rasmiylashtirilib, topilgan modda hamda fuqarolar Fargʻona viloyati DXX boshqarmasi xodimlariga topshirilgan.