Qoraqalpog‘iston Respublikasi Vazirlar Kengashi raisi, O‘zbekiston Respublikasi IIV JXD YHXX rahbari, Qoraqalpog‘iston Respublikasi Ichki ishlar vaziri hamda tegishli vazirlik va idoralarning mas’ul rahbar va xodimlari ishtirokida 2022-yil 4-apreldagi "Avtomobil yo‘llarida inson xavfsizligini ishonchli ta’minlash va o‘lim holatlarini keskin kamaytirish chora-tadbirlari to‘g‘risida"gi PQ-190-son qarori ijrosi yuzasidan kengaytirilgan yig‘ilish o‘tkazildi.

Yig‘ilishda 2025-yil davomida Qoraqalpog‘iston Respublikasi hududida sodir etilgan yo‘l-transport hodisalari atroflicha ko‘rib chiqilib, jumladan og‘ir oqibatli YTHlar, yo‘l qoplamasi va yo‘l infratuzilmasidagi kamchiliklar sabab yuzaga kelgan hodisalar, haydovchilar va piyodalar tomonidan sodir etilgan qoidabuzarliklar har bir yo‘nalish kesimida aniq misollar asosida tahlil qilindi. Shuningdek, bolalar ishtirokidagi yo‘l-transport hodisalari, ularning asosiy sabablari hamda profilaktika ishlarining samaradorligi masalalari ham tanqidiy ruhda muhokama etildi.

Yig‘ilishda IIV JXD Yo‘l harakati xavfsizligi xizmati rahbari ma’ruza qilib, Qoraqalpog‘iston Respublikasi avtomobil yo‘llarida harakat xavfsizligini ta’minlash borasida amalga oshirilgan ishlar, jumladan yo‘l belgilarini o‘rnatish, piyodalar o‘tish joylarini tashkil etish, xavfli uchastkalarda sun’iy notekisliklar barpo etish, svetoforlarni o‘rnatish hamda aholi o‘rtasida profilaktik tushuntirish ishlarini olib borish holatiga alohida to‘xtalib o‘tdi. Shu bilan birga, piyodalar ishtirokida sodir etilayotgan yo‘l-transport hodisalarining oldini olish yo‘nalishida belgilangan vazifalar ayrim mutasaddi tashkilot rahbarlari tomonidan to‘liq bajarilmayotgani tanqidiy tarzda ta’kidlab o‘tildi.

Muhokamalar yakunida yo‘l qo‘yilgan kamchiliklar, o‘z vaqtida bajarilmagan vazifalar hamda samarasiz tashkil etilgan ishlar yuzasidan mas’ul vazirlik, idora va tashkilot rahbarlariga tegishli e’tirozlar bildirilib, ularga nisbatan intizomiy choralar qo‘llanildi. Mavjud muammolarni bartaraf etish hamda PQ-190-son qaror ijrosini ta’minlash bo‘yicha aniq vazifalar belgilab berildi.