Joriy yilning 6-mart kuni soat 21:00 larda, Samarqand viloyati huquqni muhofaza qiluvchi organ xodimlari hamkorligida boʻlib oʻtgan tekshiruv davomida, Bulungʻur tumani hududidan oʻtuvchi M-39 avtomobil yoʻlida joylashgan “Yuqori nuqta” YPX maskanida YPX xodimi tomonidan “Lacetti” rusumli avtomobil haydovchisi toʻxtatilgan. Xolis va guvohlar ishtirokidagi tekshiruv davomida, avtomobil haydovchisi, 1989-yilda tugʻilgan O.A.ning choʻntagi va transport vositasining salon qismidan jami 15 dona, turli xil shaklda quyilgan, umumiy 0,525 kg miqdorda oltin boʻlaklari topilgan. Ushbu qimmatbaho boʻlaklar noqonuniy ravishda olib ketilayotganlikda gumonlanib ashyoviy dalil sifatida olingan va avtomobil vaqtincha saqlash uchun jarima maydoniga qoʻyilgan.

Holat yuzasidan IJQK Departamentining Bulungʻur tumani boʻlimi xodimlari tomonidan tergovga qadar tekshiruv harakatlari olib borilmoqda.