Ijtimoiy tarmoqda ikki nafar YPX xodimlari “Cobalt” rusumli avtomobil haydovchisini transport vositasidan tushirib, patrul avtomobilida olib ketganligi aks etgan video tarqaldi.

Voqea tafsilotlari quyidagicha:

2022-yil 12-dekabr kuni Samarqand shahar hududidan oʻtuvchi M-37 avtomobil yoʻlining 6-kilometrida YPX xodimi tomonidan “Cobalt” rusumli, 30485TTH davlat raqam belgili avtomobil haydovchisiga toʻxtash haqidagi ishora koʻrsatilganda haydovchi ishoraga rioya qilmasdan harakatda davom etgan. Xodimlar patrul avtomobili bilan boʻysunmasdan harakatlangan haydovchining ortidan kuzatib borgan. “Qorasuv massivi”da haydovchini toʻxtatish choralari koʻrilgan. Mazkur jarayonda haydovchi tomonidan xodimlarga qarshilik koʻrsatish holati atrofdagi fuqarolar tomonidan tasvirga olingan. Alkotester moslamasi bilan tekshiruv oʻtkazilganda haydovchi, 1988-yilda tugʻilgan O.R. mastlik holatidaligi aniqlangan. Haydovchiga nisbatan belgilangan tartibda maʼmuriy bayonnoma rasmiylashtirilib, uning boshqaruvida boʻlgan transport vositasi vaqtincha saqlash uchun jarima maydoniga joylashtirilgan.