Жорий йилнинг 3 сентябрь куни соат 11:05 ларда, Фарғона вилояти, Қўштепа тумани ҳудудидан ўтган 4Р-127 “Марғилон-Сойбўйи-Мингбулоқ” автомобиль йўлининг 10-километрида ҳайдовчи, 2001 йилда туғилган, ҳайдовчилик гувоҳномаси бўлмаган А.Ж. “HYUNDAI” русумли экскаваторни бошқараётиб, йўлнинг чап томонидан ўнг томонига кесиб ўтаётган пиёда, 1952 йилда туғилган Х.С.ни уриб юборган.

Натижада, пиёда, 68 ёшли Х.С. оғир тан жароҳатлари олиб воқеа жойида вафот этган.

Мазкур ЙТҲ юзасидан Қўштепа  тумани ИИБ ҳузуридаги ТБ томонидан Ўзбекистон Республикаси Жиноят Кодексининг 266-моддаси 2-қисми (одам ўлимига олиб келган транспорт воситалари ҳаракати ёки улардан фойдаланиш хавфсизлиги қоидаларини бузиш) билан жиноят иши қўзғатилиб, ҳозирда тергов ҳаракатлари олиб борилмоқда.

Барча фуқаролардан ҳайдовчилик гувоҳномасини олмай туриб, транспорт воситасини бошқармасликларини, ўзи ва ўзгалар ҳаётини хавф остига қўймасликларини, пиёдалардан эса қоидаларга амал қилишларини сўраб қоламиз.

Ўзбекистон Республикаси ИИВ ЙҲХББ Ахборот хизмати