Жорий йилнинг 8 сентябрь куни Қашқадарё вилояти ИИБ ЙҲХБ ЙПХ инспектори Б.Омонтурдиев соат 11:50 ларда, Қарши шаҳар, Насаф кўчасида жойлашган “Артел” савдо дўкони ёнида хизмат олиб бораётган вақтда, ушбу кўчада ҳаракатланиб келаётган “Нексия” русумли транспорт воситасини тўхтатган. Ҳайдовчи Д.А.нинг ушбу транспорт воситасини бошқариш ҳуқуқини берувчи меъёрий ҳужжатлари бўлмаганлиги сабабли унга нисбатан маъмурий баённома расмийлаштириб, автомашинани вақтинча сақлаш учун жарима майдончасига жойлаштирган.

Шундан сўнг, ҳайдовчи вилоят ИИБ ЙҲХБ ЙПХБ махсус отряд командирининг ўринбосари Ж.Шамсиддиновнинг хизмат хонасига бориб, автомашинани жарима майдончасидан чиқариб бериш эвазига 1.000.000 (бир миллион) сўм миқдоридаги пулларни пора тариқасида таклиф қилган.

Ж.Шамсиддинов мазкур ҳолат юзасидан билдирги орқали вилоят ИИБ бошлиғи номига мурожаат қилган.

Билдирги асосида, ҳуқуқни муҳофаза қилувчи орган ходимлари томонидан жорий йилнинг 9 сентябрь куни ўтказилган тезкор тадбир давомида, фуқаро Д.А. ЙПХ ходими Ж.Шамсиддиновга автомашинасини жарима майдончасидан чиқариб бериш эвазига 1.000.000 (бир миллион) сўм миқдоридаги пулларни пора тариқасида бераётган вақтда ашёвий далиллар билан ушланган.

Мазкур ҳолат юзасидан Ўзбекистон Республикаси Бош прокуратураси ҳузуридаги иқтисодий жиноятларга қарши курашиш департаменти Қарши шаҳар бўлими томонидан 09.09.2020 йилда Ўзбекистон Республикаси Жиноят Кодексининг 211-моддаси 1-қисми билан жиноят иши қўзғатилиб, тергов ҳаракатлари олиб борилмоқда.