Ўзбекистон Республикаси Вазирлар Маҳкамасининг 2022 йил 12 апрелдаги 172-сон қарори билан тасдиқланган “Йўл ҳаракати қоидалари”нинг 9-бандида янги норма киритилган бўлиб, унда "Конструкциясида хавфсизлик камарлари назарда тутилган транспорт воситасини бошқараётган ҳайдовчи ва унинг олд ўриндиғидаги йўловчилар ҳаракатни бошлашдан олдин хавфсизлик камарини тақиб олишлари шарт”лиги белгиланган.

Барча оммавий ахборот воситалари ҳамда ижтимоий тармоқларда янги тахрирдаги йўл ҳаракати қоидаларига киритилган ўзгартириш ва қўшимчалар тўғрисида бир-неча бор чиқишлар қилинди. Шунингдек, корхона, ташкилот, маҳалла ва транспорт уюшмаларида ҳамда автомобиль йўлларида йўл-патруль хизмати ходимлари томонидан ҳаракат иштирокчиларига тушунтириш, тарғибот-ташвиқот ишлари олиб борилди.

Янги тахрирдаги йўл ҳаракати қоидаларига киритилган ўзгартириш ва қўшимчаларнинг асосий мақсади автомобиль йўлларида содир бўлаётган оғир турдаги йўл-транспорт ҳодисаларини олдини олишга, фуқаролармизнинг соғлиғи ҳамда ҳаётини асрашга, йўл-транспорт ҳодисаларининг оғирлик даражасини камайтиришга қаратилган.

Жорий йилнинг 26 май куни соат тахминан 14:00лар чамасида Қарши шаҳар, Ислом Каримов кўчасида жойлашаган Транспорт коллежи рўпарасида, йўловчи ташиш фаолияти билан шуғулланувчи такси ҳайдовчилари томонидан норозилик билдирилиб, хавфсизлик камаридан фойдаланиш қоидаларига амал қилмасдан содир этган қоидабузарликларини бекор қилишни сўраб масъулларга мурожаат билан чиқишган.

Маълумот ўрнида, 2022 йил 14 май куни Ислом Каримов кўчасида “Lochin ko’z-Q” дастури асосида камералар ўрнатилиб ушбу камералар орқали хавфсизлик камари қоидабузарликларини аниқлаш ишга туширилганлиги тўғрисида Жамоат хавфсизлиги департаменти Йўл ҳаракати хавфсизлиги хизматининг расмий саҳифаси ҳамда бошқа ижтимоий тармоқлар орқали маълумот берилган.

Ҳозирда мазкур ҳолат юзасидан Қарши шаҳар ИИО ФМБ ходимлари томонидан суриштирув ҳаракатлари олиб борилмоқда. Барча йўл ҳаракати иштирокчиларидан амалдаги Йўл ҳаракати қоидаларига риоя этишларини сўраб қоламиз.