Жорий йилнинг 3 февраль куни ижтимоий тармоқда “Бу ДАН ходимими ёки...?” сарлавҳаси остидаги видео лавҳа тарқалди.

Видео лавҳа ўрганилганда, жорий йилнинг 1 февраль куни соат 23:15ларда, Тошкент шаҳар, Яшнабод тумани, Шаҳрисабиз кўчасида хизмат олиб борган ЙПХ ходими Д.Мусаев томонидан ҳайдовчи М.М. бошқарувидаги “Скутер” транспорт воситасига тўхташ ишораси берилганда, ҳайдовчи ишорага бўйсунмасдан ҳаракатини давом эттирган.

Кўрилган чоралар натижасида, ҳайдовчи ушбу Шаҳрисабз кўчасида ЙПХ ходими Н.Досимов томонидан тўхтатилган.

Суҳбат жараёнида ҳайдовчи спиртли ичимлик истеъмол қилганликда гумонланган ва тиббий текширувга таклиф этилган.

Тиббий текширув хулосасига кўра, ҳайдовчининг мастлик ҳолати тасдиқланган ва ЙПХ ходими Д.Мусаев томонидан маъмурий баённома расмийлаштирилиб, транспорт воситаси вақтинча сақлаш учун жарима майдончасига жойлаштирилган.

Ўзаро мулоқот вақтида ЙПХ ходими Д.Мусаев ҳайдовчига нисбатан қўл ҳаракатлари ишлатганлик ҳолати видео лавҳада акс этган бўлиб, ушбу ҳолат юзасидан Тошкент шаҳар ИИББ ЙҲХБ томонидан хизмат текшируви ўтказилмоқда.

Ўзбекистон Республикаси ИИВ ЙҲХББ Ахборот хизмати