Navoiyda sodir bo‘lgan yo‘l-transport hodisasi bo‘yicha ma’lumot

2026-yil 5-may kuni soat 09:05 larda Navoiy viloyati, Nurota tumani, "Yangihayot" MFY hududidan o‘tuvchi mahalliy ahamiyatdagi 85V-043 avtomobil yo‘lining 8–9-kilometrlari oralig‘ida haydovchi, 1992-yilda tug‘ilgan G.Q., tegishli hujjatlarsiz "Matiz" rusumli avtomobilni boshqarayotib, tajribasizligi va chalg‘ishi oqibatida rul boshqaruvini yo‘qotgan va yo‘lning chap tomoniga chiqib ketib, ag‘darilgan.

Hodisa oqibatida haydovchi G.Q. ko‘rsatilgan muolajalarga qaramasdan shifoxonada vafot etgan. Avtomobilda bo‘lgan 14 nafar voyaga yetmagan yo‘lovchi (ulardan biri haydovchi G.Q.ning farzandi) turli tan jarohatlari bilan shifoxonaga yetkazilgan.

Surishtiruvlar davomida G.Q. oilaviy nodavlat maktabgacha ta’lim tashkiloti rahbari sifatida faoliyat olib borgani ma’lum bo‘ldi. 14 nafar bolalarning "Matiz" avtomashinasida qoidalarga zid ravishda tashilishiga ularning ota-onalari ham e’tiborsiz bo‘lganini ko‘rish mumkin.

Mazkur holat yuzasidan tergov oldi surishtiruv harakatlari olib borilmoqda.

Barcha haydovchilardan tegishli hujjatlarsiz transport vositasini boshqarmasliklarini hamda odam tashish qoidalariga qat’iy amal qilishlarini so‘raymiz. Ota-onalardan esa voyaga yetmagan farzandlarini xavfsizligini ta’minlashga jiddiy e’tibor qaratishlarini so‘rab qolamiz.