FVV xabariga ko‘ra, joriy yilning 12 oktabr kuni soat 18:30 larda “Qamchiq” dovonining 240 - kilometrida “Toshkent-Vodiy” yo‘nalishida harakatlangan “Spark” rusumli avtomobil haydovchisi boshqaruvni yo‘qotib, yo‘l tagidan suv o‘tkazuvchi inshootga tushib ketgan.

Voqea joyiga yong‘in-qutqaruv boshqarmasining qutqaruvchilari, yo‘l-patrul xizmati va tez tibbiy yordam xodimlari yetib kelishgan.

Qutqaruvchilar tomonidan maxsus asbob-anjomlar yordamida avtomashinada bo‘lgan haydovchi va bir nafar yo‘lovchi chiqarib olinib, tez tibbiy yordam xodimlariga topshirilgan. Shundan so‘ng maxsus avtokran yordamida suv o‘tkazuvchi inshootdan avtomashina chiqarib olingan. Bu vaqtda yo‘l-patrul xizmati xodimlari yo‘l harakati xavfsizligini ta’minlagan. Qutqaruvchilarning tezkorlik bilan amalga oshirgan harakatlari natijasida ikki inson hayoti saqlab qolingan.

Barcha haydovchilardan yo‘llarda harakatlanish vaqtida qoidalarga rioya qilishlarini so‘rab qolamiz