2022-yil 30-aprel kuni ijtimoiy tarmoqlarda Andijon viloyatida "Jarima maydonida turgan yoqilg‘i yetkazib beruvchi avtomobillar "Labo"lar qanday qoidani buzgan" sarlavhasi ostida video tarqaldi

Andijon viloyati IIB YHXB Axborot dispetchirlik xizmati tomonidan “Labo” rusumli avtotransport vositalari Andijon viloyati Andijon shahri xududida aholiga pullik xizmat ko‘rsatib, yoqilg‘i yetkazib berish faoliyati bilan shug‘ullanayotganlik holatiga aniqlik kiritish uchun tekshirildi.

Tekshiruvlar natijasida, mazkur transport vositalari O‘zbekiston Respublikasi Vazirlar Mahkamasining 2020-yil 30-noyabrdagi 758-son hamda 2022-yil 22-fevraldagi 86-son qarorlari talablariga zid ravishda tegishli ruxsatnomasiz noqonuniy tarzda qayta jihozlanganligi aniqlanib, YPX inspektorlari tomonidan transport vositalari haydovchilariga nisbatan O‘zbekiston Respublikasi MJtKning 125-moddasi 3-qismi bilan ma’muriy bayonnoma rasmiylashtirilib, transport vositalari vaqtincha saqlash uchun jarima maydoniga joylashtirilgan.

Mazkur holat yuzasidan Ichki ishlar vazirligi Jamoat xavfsizligi departamenti Yo‘l harakati xavfsizligi xizmati xodimlari tomonidan barcha hududlarda mazkur turdagi faoliyat bilan shug‘ullanuvchi yuridik va jismoniy shaxslarga tegishli transport vositalari qayta jihozlanganligining qonuniyligi tekshirilmoqda.

Barcha haydovchilardan belgilangan talablarga rioya qilgan holda harakatlanishlarini so‘rab qolamiz!