2021-yil 13-oktabr kuni soat 10:30 larda, Toshkent viloyati, Oʻrtachirchiq tumani hududidan oʻtgan “Avangard-Oʻrtasaroy” avtomobil yoʻlining 5-kilometrida haydovchi B.T. boshqaruvida boʻlgan “Damas” rusumli hamda haydovchi U.A. boshqaruvida boʻlgan “Vaz-2106” rusumli avtomobillar ishtirokida toʻqnashuv sodir boʻlgan.

Toʻqnashuv natijasida yoʻlovchi Z.E. yengil tan jarohati olib shifoxonaga murojaat qilgan.

Mazkur YTH yuzasidan tuman IIB YHXB masʼul xodimlari tomonidan toʻplangan hujjatlar 2021-yil 27-oktabr kuni jinoyat ishlari boʻyicha Oʻrtachirchiq tumani sudi tomonidan koʻrib chiqilib, fuqaro B.T. Oʻzbekiston Respublikasi Maʼmuriy javobgarlik toʻgʻrisidagi Kodeksning 133-moddasida nazarda tutilgan huquqbuzarlikni sodir etgan deb topilib, unga nisbatan BHMning uch baravari miqdorida jarima jazosi belgilangan.

Shuningdek, huquqbuzar B.T.dan Xalq banki Oʻrtachirchiq filiali foydasiga 19 186 042 (oʻn toʻqqiz million bir yuz sakson olti ming qirq ikki) soʻm, Xalq banki Oʻrtachirchiq filialidan jabrlanuvchi A.A.ning foydasiga 7 773 294 (yetti million yetti yuz yetmish uch ming ikki yuz toʻqson toʻrt) soʻm zarar undirilishi belgilangan.

Barcha haydovchilardan yoʻllarda qoidalarga rioya qilgan holda, ehtiyotkorlik bilan harakatlanishlarini soʻraymiz.