Dastlabki maʼlumotlarga koʻra, bugun, 2022-yil 31-oktabr kuni soat 15:30 larda Samarqand viloyati, Jomboy tumani hududidan oʻtuvchi M-39 “Toshkent-Samarqand” avtomobil yoʻlining 1071-kilometrida “DAF” rusumli yuk avtomobilining old chap tomon shinasi havo qoʻyib yuborishi oqibatida haydovchi boshqaruvni yoʻqotgan va oldinda, ortga qayrilib olish manyovrini bajarayotgan haydovchi boshqaruvidagi “Lada Largus” rusumli avtomobilga toʻqnashgan.

Toʻqnashuv natijasida yuk avtomobilida yongʻin yuzaga kelgan.

Yongʻin oʻt oʻchiruvchilar tomonidan bartaraf etilgan. Hodisa oqibatida “Lada Largus” avtomobilining haydovchisi shifoxonaga olib ketilgan.

Mazkur YTH yuzasidan tuman IIB YHXB hamda FVB xodimlari tomonidan surishtiruv harakatlari olib borilmoqda.

Barcha haydovchilardan yoʻllarda ehtiyotkor boʻlib, boshqaruvidagi transport vositasining texnik sozligiga eʼtiborli boʻlishlarini soʻraymiz.