FVV xabariga koʻra, 2022-yil 16-oktabr kuni soat 21:09 da “Qamchiq” Maxsus qidiruv, yongʻin-qutqaruv boshqarmasi navbatchi-dispetcheriga kelib tushgan xabarga koʻra, Namangan viloyati, Pop tumani hududidan oʻtuvchi A-373 “Toshkent-Oʻsh” avtomobil yoʻlining 223-kilometrida “Vodiy-Toshkent” yoʻnalishida harakatlanib kelayotgan “Isuzu” rusumli yuk avtomobili haydovchisi, boshqaruvni yoʻqotishi natijasida qarama-qarshi oqimni ajratib turuvchi temir toʻsiqqa urilgan va oʻng tomondagi pastlikka agʻdarilib ketgan.

Voqea joyiga FVV hamda YHXB xodimlari zudlik bilan yetib borgan va pastlikka agʻdarilib ketgan yuk avtomobilini maxsus texnikalar yordamida chiqarib olishgan.

Hodisa oqibatida tan jarohati olgan “Isuzu” haydovchisiga birinchi tez tibbiy yordam koʻrsatilib, shifoxonaga yuborilgan.

Mazkur holat yuzasidan tuman FVB va YHXB xodimlari tomonidan surishtiruv harakatlari olib borilmoqda.

Barcha haydovchilardan yoʻllarda qoidalarga rioya qilgan holda, ehtiyotkorlik bilan harakatlanishlarini soʻraymiz.