FVV xabariga koʻra, bugun, 30-dekabr kuni Samarqand viloyati, Oqdaryo tumani, “Miyonqol” mahallasida “Nexia” rusumli avtomobil haydovchisi boshqaruvni yoʻqotishi natijasida, transport vositasi mahalla ichidan oqib oʻtgan kanalga tushib ketgan. Avtomobil salonida haydovchi va bir nafar yoʻlovchi boʻlgan.

Hodisa oqibatida tan jarohati olgan va halok boʻlgan fuqarolar yoʻq.

Voqea joyiga zudlik bilan tuman FV boʻlimi qutqaruvchilari va tegishli xizmat xodimlari yetib kelgan. Maxsus texnika yordamida transport vositasi kanaldan olib chiqilgan.

Barcha haydovchilardan yoʻllarda ehtiyotkor boʻlib, qoidalarga rioya qilishlarini soʻraymiz.