Toshkent viloyati ichki ishlar bosh boshqarmasi, yo'l harakati xavfsizligi boshqarmasida bu yilgi 8 mart bayrami o'zgacha tarzda nishonlandi. Yo'l harakati xavfsizligi boshqarmasiga viloyatning barcha shahar va tumanlaridan haydovchi ayollar taklif etildi. Ular "Avtomalika" ko'rik tanlovida ishtirok etishdi.

Ko'rik-tanlovga yoshi, egallagan kasbidan qat'iy nazar haydovchilik guvohnomasi bor bo'lgan, jamiyat hayotida faol bo'lgan ayollar taklif etildi. Dastlabki bosqichda ishtirokchilar "yo'l harakati qoidalari" bo'yicha o'z bilimlarini test sinovlarida tekshirib ko'rishdi.

Musobaqaning eng qiziqarli va hayajonli onlari boshlandi. Har bir haydovchi musobaqa uchun maxsus tayyorlangan o'quv avtomobilida haydash mahoratlarini namoyish etishdi. Hayajon, Sevinch, tashvish alomatlari aks etgan chehralar navbatma-navbat transportni boshqarib, ko'rik-tanlov shartlarini bajarishdi.

Kimdir hayajondan motorni o'chirib qo'ydi. Boshqa ishtirokchi shartli garajga kirishda shoshildi. Ammo yo'l qo'yilgan xatolardan hech kim xafa bo'lgani yo'q. Aksincha, bu xatolar ular uchun saboq bo'lganligini ta'kidlashdi. Qiziqarli baxs munozaralar bilan o'tgan musobaqalar ham yakuniga etdi. Navbat g'oliblarni rag'batlantirishga keldi. G'oliblar uchun esa yo'l harakati xavfsizligi boshqarmasi hamda "Alskom" sug'urta kompaniyasining viloyat bo'limi maxsus sovg'alar ajratishdi. Aytish lozimki, taqdirlash uchun aynan ayollar bop, ro'zg'or uchun zarur bo'lgan sovg'alar olindi.

G'olib bo'lish naqadar ajoyib. His hayajonlar ortda qoldi. G'oliblar esa sovg'alarni olishdi. Musobaqada Oliy o'rin Qibray tumanidan kelgan ishtirokchi Shoxira Saydazimovaga nasib etdi.

Tadbir yig'ilganlarning barchalariga manzur bo'ldi. Bu kabi musobaqalarni tez-tez o'tkazib turish zarur degan fikrlar bildirildi. Bu to'g'ri fikr, chunki, harakatlanish xavfsizligini ta'minlashda, harakatlanish madaniyatini yuksaltirishda musobaqalarning ahamiyati juda ham katta. Biz g'oliblarni, shuningdek, barcha opa-singillarimizni bayram bilan yana bir bor muborakbod etamiz.

O'zbekiston Respublikasi IIV YHXBB axborot xizmati