2022-yil 20-oktabr kuni IIV SHXBB Samarqand viloyati boʻyicha boshqarmasiga fuqaro ariza bilan murojaat qilgan. Murojaatda: 2022-yil 16-oktabr kuni soat 17:00 larda spirtli ichimlik isteʼmol qilib, oʻziga tegishli boʻlgan “Nexia-3” rusumli avtomobilni Samarqand shahar, Rudakiy koʻchasida boshqarib borayotgan vaqtida YPX inspektorlari tomonidan toʻxtatilib, mastlik holati boʻyicha alkotester moslamasi orqali tekshiruvdan oʻtganligini, mastlik holati tasdiqlanganligi sababli, unga nisbatan maʼmuriy bayonnoma rasmiylashtirilib, avtomobili vaqtincha saqlash uchun jarima maydoniga joylashtirilganligini, shundan soʻng, “B” ismli shaxs unga nisbatan rasmiylashtirilgan bayonnomani tanishlari orqali sudga yubormaslik va avtomobilini jarima maydonidan olib chiqishni vaʼda qilib 1.600 AQSH dollari miqdorida pul berishini soʻraganligini maʼlum qilgan.

Mazkur murojaat yuzasidan, 2022-yil 20-oktabr kuni IIV SHXBB Samarqand viloyati boʻyicha boshqarmasi tezkor xodimlari tomonidan oʻtkazilgan tezkor tadbir davomida, fuqaro Q.B. murojaat muallifidan 1.600 AQSH dollari miqdoridagi pullarni olgan vaqtida ushlanib, tegishli tartibda hujjatlashtirilgan.

Holat yuzasidan Samarqand viloyati IIB huzuridagi Tergov boshqarmasi tomonidan tergovga qadar tekshiruv harakatlari olib borilmoqda.