Ilk marta 1973-yilda Shvetsariyada yoqilgʻi yetishmovchiligi sababli mamlakat hukumati aholidan 4 kun mobaynida avtomobillardan foydalanmaslikni soʻragan. Shundan soʻng, Yevropada yilda bir kun avtomobillardan foydalanmaslik aksiyasi sekin-asta paydo boʻlgan.

1997-yilda Buyuk Britaniyada, 1998-yilda esa Fransiyada ilk marta bu kunni “Butun dunyoda avtomobilsiz kun” sifatida nishonlash boshlangan.

2001-yilda esa bunday tashabbusga dunyoning 31 mamlakatidan minglab shaharlar qoʻshilgan.

2002-yilda Yevrokomissiya har yili 16-22-sentabr kunlarida “Yevropa mobil haftaligi”ni oʻtkazishni joriy qilgan.

Mamlakatimizda esa, Vazirlar Mahkamasining 2020-yil 19-noyabrdagi 735-sonli qarori bilan 22-sentabr sanasi rasman “Avtomobilsiz kun” sifatida eʼlon qilingan.

Mazkur kunda aholiga shaxsiy avtomobillardan foydalanmaslik, imkon qadar piyoda yurish, jamoat transportlarida yoki velosiped va shunga oʻxshash salomatlik uchun foydali boʻlgan transport vositalarida harakatlanish tavsiya etilgan.