2025-yil 22-avgust kuni IIV JXD Yo‘l harakati xavfsizligi xizmati rahbariyati Navoiy viloyatiga tashrif buyurib, viloyat hududida yo‘l harakati xavfsizligini ta’minlash borasida amalga oshirilayotgan ishlar bilan tanishdi.

Tashrif doirasida Navoiy shahridagi Alisher Navoiy va Amir Temur hamda Alisher Navoiy va Memorlar ko‘chalari kesishmasidagi chorrahalarda sodir bo‘layotgan yo‘l-transport hodisalarini oldini olish maqsadida chorrahalarning geometrik parametrlarini takomillashtirish ishlari o‘rganildi. 

Shuningdek, Navbahor tumani hududidan o‘tuvchi A-379 avtomobil yo‘lining 5–8 va 11–14-kilometrlari hamda D-067 yo‘lining 159–177 va 180–184-kilometrlari oralig‘ida piyodalar trotuarlari va velosiped yo‘laklarini barpo etish, shuningdek, sun’iy yoritish tizimlarini o‘rnatish ishlari ko‘zdan kechirildi.

Shu bilan birga, Qiziltepa tumani hududidan o‘tuvchi 4-R63 avtomobil yo‘lining 68-kilometrida piyodalarning belgilanmagan joydan kesib o‘tish holatlarini oldini olish maqsadida o‘rnatilayotgan temir panjaralar, Xatirchi tumanidagi 85-B027 avtomobil yo‘lining 2-kilometrida rekonstruksiya qilinayotgan ko‘prikda olib borilayotgan ishlar ham o‘rganildi. Mutaxassislarga zarur tavsiya va ko‘rsatmalar berildi.

Shuningdek, mahalliy aholi bilan ochiq muloqot tashkil etildi. Fuqarolarning taklif va istaklari tinglanib, yo‘l harakati xavfsizligini yanada mustahkamlashga qaratilgan qo‘shimcha chora-tadbirlarni amalga oshirish bo‘yicha tegishli topshiriqlar berildi.