“Qamchiq” dovonidan oʻtuvchi xalqaro ahamiyatdagi A-373 avtomobil yoʻlining 221-kilometridagi “Ohangaronsoy” koʻprigida taʼmirlash ishlari boshlanganligi munosabati bilan mazkur yoʻlning “Toshkent-Vodiy” yoʻnalishi vaqtincha yopilib, yoʻlning “Vodiy-Toshkent” yoʻnalishi beton toʻsiqlar yordamida ikkiga ajratildi va ushbu tomonda qarama-qarshi yoʻnalishlar tashkil etildi.

Haydovchilarni ogohlantiruvchi va ularga yoʻnalishlarni koʻrsatuvchi hamda harakat xavfsizligini taʼminlaydigan tegishli belgilar oʻrnatildi.

Shuningdek, tungi vaqtda ham xavfsizlikni taʼminlash maqsadida vaqtincha tashkil etilgan yoʻnalishlarga chiroqlar oʻrnatilib, yoʻnalish koʻrsatuvchi belgilarni ham yoritish choralari koʻrildi.

Barcha haydovchilardan koʻprik taʼmirlanayotganligi sababli tashkil etilgan chora-tadbirlarni toʻgʻri tushunushlarini, mazkur joydan harakatlanib oʻtishda tartibga soluvchilarning ishoralariga, yoʻl belgilari va chiziqlarining talablariga rioya etgan holda, tezlikni oshirmasdan, ehtiyotkorlik bilan harakatlanishlarini soʻraymiz.