Joriy yilning 5-aprel kuni ijtimoiy tarmoqda “Nexia-3” rusumli avtomobil haydovchisi tomonidan sodir etilgan qoidabuzarlik holati boʻyicha “Damas” rusumli avtomobil egasiga nisbatan jarima solish toʻgʻrisidagi qaror chiqarilganligi aks etgan surat va izoh tarqaldi.

Mazkur xabar oʻrganilganda, 2022-yilning 19-mart kuni soat 00:02da Qashqadaryo viloyati, Gʻuzor tumani, 4P-79 avtomobil yoʻlining 18-29-kilometrlari oraligʻida, “Nexia-3” rusumli, 70C015RA davlat raqam belgili avtomobil haydovchisi 70 km/soat tezlik chegaralangan joyda 135 (135-5=130) km/soat tezlikda harakatlanganligi maxsus moslama yordamida qayd etilgan boʻlib, qayd etish vaqtida ushbu avtomobil haydovchisi yoʻl qoʻygan xatolik, yaʼni davlat raqam belgisining ustiga toʻgʻri aniqlanishini cheklovchi qoplama yopishtirganligi sabab, avtomatik tarzda 70C015RA davlat raqam belgisidagi “5” raqami “8” boʻlib, 70C018RA tarzida notoʻgʻri qayd etilganligi va ushbu qoidabuzarlik yuzasidan “Damas” rusumli, 70C018RA davlat raqam belgili avtomobil mulkdoriga nisbatan jarima solish toʻgʻrisidagi qaror tasdiqlanganligi maʼlum boʻldi.

Ayni vaqtda ushbu qoidabuzarlik yuzasidan “Damas” rusumli, 70C018RA davlat raqam belgili avtomobil mulkdoriga nisbatan tasdiqlangan jarima solish toʻgʻrisidagi qaror belgilangan tartibda bekor qilinib, “Nexia-3” rusumli, 70C015RA davlat raqam belgili avtomobil mulkdoriga nisbatan tasdiqlangan.

Barcha haydovchilardan tezlik meʼyoriga rioya qilishlarini, transport vositasining davlat raqam belgilarini koʻrish imkoniyatini cheklaydigan, ularni anglashga toʻsqinlik qiladigan turli ashyolar oʻrnatmasliklarini soʻraymiz.