Yurtimizning ko‘plab hududlarida qor yog‘ib, havo harorati pasayishi ortidan yo‘llarning ayrim qismlarida muzlamalar xosil bo‘lmoqda. Yo‘l xavfsizligiga mas’ul xodimlar tomonidan yo‘llarni qordan tozalash, muzlamalarni bartaraf qilish bo‘yicha tegishli chora-tadbirlar amalga oshirilmoqda. Bunday ob-havo sharoitida haydovchilarda ham katta mas’uliyat va tajriba bo‘lishi zarur. Ayniqsa, yo‘lovchi tashish bilan shug‘ullanuvchi haydovchilar o‘ta ehtiyotkor bo‘lishlari, tezlikni, oraliq masofani me’yorida saqlab, yo‘lovchilarni sog‘-salomat manzilga olib borishlari lozim. Yo‘lovchi tashuvchi haydovchilarni xushyorlikka chaqirish maqsadida YPX xodimlari avtoturargohlarda tushuntirishlar olib borishmoqda. Qoidalar, me’yorlar yana bir bor eslatilib, haydovchilarga zarurat bo‘lmasa tungi vaqtlarda harakatlanmaslik tavsiya qilinmoqda.