2021-yil 17-dekabr kuni soat 09:30 larda, Surxondaryo viloyati, Denov tumani, Namozgoh M. F. Y, Sh. Rashidov ko‘chasida xizmat olib borayotgan YPX xodimi tomonidan "Vaz-2105" rusumli avtomobil haydovchisi to‘xtatilgan. Tekshiruv jarayonida, YPX xodimi haydovchidan spirtli ichimlik hidi kelayotganligini payqagan va mastlikda gumonlab tekshiruvga taklif qilgan. Tekshiruv natijasiga ko‘ra, haydovchi I. K. ning spirtli ichimlikdan mastlik holati tasdiqlangan va unga nisbatan O‘zbekiston Respublikasi Ma’muriy javobgarlik to‘g‘risidagi Kodeksning 131-moddasi tartibida bayonnoma rasmiylashtirilib, avtomobil vaqtincha saqlash uchun jarima maydoniga qo‘yilgan.

Ushbu vaqtda haydovchi I. K. unga nisbatan chora ko‘rilmasligi va avtomobilini jarima maydonidan olib chiqish evaziga YPX xodimiga 300 (uch yuz) AQSH dollari miqdoridagi pullarni pora tariqasida bermoqchi ekanligini ma’lum qilgan.

YPX xodimi viloyat IIB boshlig‘i nomiga bildirgi orqali murojaat qilib, pora taklif qilayotgan fuqaroga qonuniy chora ko‘rilishini so‘ragan.

Xodimning bildirgisi asosida 2021-yil 17-dekabr kuni soat 20:00 larda viloyat huquqni muhofaza qiluvchi organ xodimlari hamkorligida tezkor tadbir o‘tkazilib, Denov tumani, Namozgoh MFY hududida joylashgan jarima maydoni yaqinida fuqaro I. K. YPX xodimiga 2.150.000 (ikki million bir yuz ellik ming) so‘m hamda 100 (yuz) AQSH dollari miqdoridagi pullarni pora tariqasida bergan vaqtda ushlangan.

Hozirda ushbu holat yuzasidan Denov tumani prokuraturasi tomonidan tergovga qadar tekshiruv harakatlari olib borilmoqda.