2021-yil 12-noyabr kuni Oliy Majlis Qonunchilik palatasining bir guruh deputatlari yo‘l harakati xavfsizligini ta’minlash borasidagi amalga oshirilayotgan ishlar bilan yaqindan tanishish maqsadida Ichki ishlar vazirligi tizimidagi boshqarma va markazlarga tashrif buyurdilar:

Dastlab deputatlar Mirobod tumani, Fayzobod ko‘chasida joylashgan Toshkent shahar IIBB YHXB RO‘ va IO binosiga tashrif buyurishdi. Bo‘limda, fuqarolarga yaratilgan shart-sharoitlar, ulardan imtihon olish jarayonlari va transport vositalari egalariga davlat raqam belgilarini berish tartibi bilan yaqindan tanishib chiqdilar.

Tashrif davomida deputatlar “HUMO-F-SERVIS” MCHJ diagnostika markazida bo‘ldilar. Mazkur markaz yurtimizdagi avtotransport vositalarini texnik ko‘rikdan o‘tkazuvchi yirik xususiy diagnostika markazlaridan hisoblanadi. Markaz tomonidan o‘tgan davr mobaynida 1500 ta yengil tipdagi avtotransport vositalari texnik ko‘rikdan o‘tkazilgan. Bugungi kunda respublikada 136 ta bunday faoliyat bilan shug‘ullanuvchi markazlar faoliyat olib bormoqda.

Shundan so‘ng, deputatlar IIV Yo‘l harakati xavfsizligi bosh boshqarmasi binosiga tashrif buyurdilar. Deputatlarga respublikadagi yo‘l harakati xavfsizligini ta’minlashning samarali boshqaruvi, hududlardagi boshqarma va bo‘linmalar faoliyati ustidan nazorat o‘rnatish borasidagi ishlar to‘g‘risida ma’lumot berildi.
Shuningdek, deputatlarga Toshkent shahar yo‘l harakati xavfsizligi boshqarmasi “Maxsus bataloni” faoliyati ham tanishtirildi. Bugungi kunda yangidan ta’mirlangan va barcha qulayliklarga ega mazkur batalon oliy martabali va qo‘riqlovdagi shaxslarning harakati xavfsizligini ta’minlaydi.

Mazkur tashrif Oliy Majlis Qonunchilik palatasida o‘tkaziladigan mazkur eshituvning samarali tashkil etilishiga, shuningdek vazirlik axborotini qizg‘in va atroflicha muhokama qilib, kelgusida sohani yanada rivojlantirishga qaratilgan Qonunchilik palatasining qarori qabul qilinishiga o‘zining ijobiy ta’sirini ko‘rsatadi.

O‘zbekiston Respublikasi IIV YHXBB Axborot xizmati