Bolalar kontentini rivojlantirish markazi “Yo‘l-Bars berar dars” nomli, bolalarga yo‘l harakat qoidalarini o‘rgatuvchi ko‘p qismli multserial loyihasiga ijodiy tanlov e’lon qiladi.

Tanlov shartlari

Tanlovga taqdim etiladigan materiallar quyida ko‘rsatilgan talablarga muvofiq bo‘lishi lozim:

1) loyihaning asosiy qahramonlari, syujet liniyasi, g‘oya va mazmuni aks etgan, davlat tilida, adabiy til va imlo qoidalariga rioya qilingan holda A4 format, 14 keglda, “Times New Roman” shriftida, 1,0 intervalda yozilgan 2-3 betdan iborat sinopsisning qog‘oz va elektron shakli;

2) loyihani amalga oshiradigan ijodiy guruh tarkibi va filmografiyasi, studiya tomonidan amalga oshirilgan loyihalar, multserial qahramonining taxminiy qiyofasi va loyihani amalga oshirish bilan bog‘liq boshqa jarayonlarni qamrab oluvchi taqdimotning albom shakli (qog‘oz va elektron variantda);

3) loyihaning taxminiy xarajatlar smetasi.

Takliflar berish muddati tugagan paytda kamida ikkita loyiha qabul qilingan bo‘lsa, tanlov sharti bajarilgan, deb topiladi.

Bolalar kontentini rivojlantirish markazi Ekspertlar kengashi bir oy davomida loyihalarni ko‘rib chiqadi, baholaydi, g‘olib loyihani belgilaydi hamda yig‘ilish bayoni bilan rasmiylashtiradi.

G‘olib aniqlanmagan holda, qayta tanlov e’lon qilinadi.

Tanlov ishtirokchilari e’londa ko‘rsatilgan manzil va tartib asosida o‘z loyihalariga ariza hamda studiya haqida qisqacha ma’lumotni biriktirgan holda, Bolalar kontentini rivojlantirish markaziga taqdim qilishlari lozim.

Tanlov shartlariga qat’iy amal qilinmagan, imloviy xatolari bor, mavzuga aloqasi bo‘lmagan, faqat internet ma’lumotlari va sun’iy intellekt tayyorlagan matndan iborat loyihalar tanlovga qo‘yilmaydi.

Taqdim etilayotgan loyihalarda bolalarning ma’naviy hamda ruhiy dunyosiga salbiy ta’sir ko‘rsatuvchi, insoniy qadriyatlarga zid, milliy mentalitetimiz va an’analarimizga, yosh toifasiga mos bo‘lmagan munosabatlar aks ettirilmasligi lozim.

Tanlovga hujjatlar 2025-yil 13-oktabrdan 2025-yil 13-noyabrga qadar qabul qilinadi.

Mazkur loyiha O‘zbekiston Respublikasi Maktabgacha va maktab ta’limi vazirligi hamda O‘zbekiston Respublikasi Ichki ishlar vazirligi Jamoat xavfsizligi departamentining Yo‘l harakati xavfsizligi xizmati bilan hamkorlikda amalga oshirilmoqda.

Izoh: taqdim etilgan loyihalarga taqriz berilmaydi va mualliflarga qaytarilmaydi.

Telefon: +998555111505 (ichki 1005).

Manzil: Toshkent shahri, Olmazor tumani, Ziyo ko‘chasi, 2-“A” uy.