Oʻzbekiston Respublikasi Bosh prokuraturasi huzuridagi Iqtisodiy jinoyatlarga qarshi kurashish departamentining xabariga koʻra, Bosh prokuratura huzuridagi Departamentning Yashnobod tuman boʻlimi tomonidan DXX xodimlari bilan hamkorlikda oʻtkazilgan tezkor tadbirda fuqaro J.N. fuqaro M.I.ga 1 500 AQSH dollari evaziga yuqori lavozimda ishlovchi tanishlari yordamida hech qanday imtihonlarsiz haydovchilik guvohnomasini olib berishini aytib, oldindan 750 AQSH dollarini olgan vaqtida ashyoviy dalillar bilan ushlangan.

Shu kabi, Departamentning Dehqonobod tuman boʻlimi va viloyat boshqarmasi xodimlari hamkorligida oʻtkazilgan tezkor tadbirda fuqaro Sh.O. fuqaro S.U. va uning tanishi J.T. lar haydovchilik guvohnomasi olish uchun oʻqimagan boʻlsada, mudofaaga koʻmaklashuvchi “Vatanparvar” tashkilotida ishlovchi oʻzining tanishlari yordamida 6 oy oʻqiganligi haqida tegishli hujjat rasmiylashtirib berishi evaziga 7,2 mln soʻmni olgan vaqtida ashyoviy dalillar bilan ushlangan.

Departamentning Shahrixon tuman boʻlimi va IIB xodimlari hamkorligida oʻtkazilgan tezkor tadbirda esa, “A.I.T.” MCHJ avtomaktabi oʻrgatuvchi ustasi B.J. fuqaro I.I.ga “B” toifali haydovchilik guvohnomasini olib berishini vaʼda qilib, evaziga 650 AQSH dollarini olgan vaqtida ashyoviy dalillar bilan ushlangan.

Mazkur holatlar yuzasidan Jinoyat kodeksining 168-moddasi (firibgarlik) va 28, 211-moddasi (pora berish) bilan jinoyat ishlari qoʻzgʻatilib, tergov harakatlari oʻtkazilmoqda.