Haydovchilik guvohnomasini olish uchun belgilangan yosh meʼyorlariga rioya qilgan holda, haydovchilarni tayyorlash faoliyati bilan shugʻullanuvchi taʼlim muassasalariga istalgan vaqtda borib, shartnoma tuzib oʻqishingiz mumkin.

Ammo oʻqish vaqtida mashgʻulotlarga qatnashmasdan, oʻqimasdan vaqt oʻtkazish endilikda oʻzingizga zarar. Chunki, Vazirlar Mahkamasining 2021-yil 4-maydagi 272-son qaroriga muvofiq, endilikda haydovchilik guvohnomasini olish uchun topshiriladigan nazariy va amaliy imtihonlar tadbirkorlik subyektlari tomonidan inson omili cheklangan, avtomatlashtirilgan avtodromda va imtihon olish xonalarida oʻtkazilishi yoʻlga qoʻyilmoqda.

Ushbu tizim inson omili toʻliq cheklangan, avtomatlashtirilgan dastur yordamida haydovchilikka nomzodlarni oʻquv muassasiga kelib ketishlarini, darslarda va mashgʻulotlarda qatnashishlarini, ichki imtihonlardan oʻtgan yoki oʻtmaganliklarini toʻliq nazoratini amalga oshirib, yakuniy nazariy va amaliy imtihonlarga ruxsat beradi.

Unutmang, imtihonlardan oʻtish uchun birgina imkoniyatingiz bor — bu ham boʻlsa yaxshi oʻqish, yoʻl harakati qoidalarini puxta oʻzlashtirish va avtomototransport vositasini boshqarishni mukammal oʻrganishdir.

Kerakli malakaga ega boʻlmasdan, korrupsion yoʻllar orqali haydovchilik guvohnomasini olish haqida oʻylash endilikda ilojsiz va notoʻgʻri qaror ekanligi haqida ogohlantiramiz.

Shuni inobatga olib, yana bir bor haydovchilik huquqini olish masalasiga jiddiy eʼtibor qaratishingizni va oʻz ustingizda doimiy tarzda ishlashingizni, haydovchilarni tayyorlash faoliyati bilan shugʻullanuvchi taʼlim muassasalari maʼmuriyatidan esa, oʻz oʻquvchilariga yoʻl harakati qoidalarini puxta va amaliy mashgʻulotlarda avtotransport vositasini mukammal boshqarishga oʻrgatishlarini soʻraymiz.