Oʻzbekiston Respublikasi Bosh prokuraturasi huzuridagi Iqtisodiy jinoyatlarga qarshi kurashish departamentining xabariga koʻra, Bosh prokuratura huzuridagi Departamentning Bandixon, Denov tumanlari va DXX xodimlari hamkorligida oʻtkazilgan tezkor tadbirlarda "A.A." MCHJ va "Y.M." xususiy avtomaktabi oʻrgatuvchi ustalari 2 nafar fuqaroga haydovchilik guvohnomalarini olib berishi evaziga jami 800 AQSH dollari va 1,2 mln soʻmni olgan vaqtlarida ashyoviy dalillar bilan ushlanganlar.

Departamentning Toʻrtkoʻl tuman boʻlimi va DXX xodimlari hamkorligida oʻtkazilgan tezkor tadbirda fuqaro X.B. fuqaro N.X.ga goʻyoki Beruniy tumani YHXBda ishlovchi tanishlari yordamida haydovchilik guvohnomasini olib berishi evaziga 700 AQSH dollarini olgan vaqtida ashyoviy dalilar bilan ushlangan.

Shu kabi, Departamentning Vobkent tumani boʻlimi va Buxoro viloyati IIB xodimlari hamkorligida oʻtkazilgan tezkor tadbirda fuqaro S.R. fuqaro G.T.ni haydovchilik guvohnomasi olish uchun boʻlib oʻtadigan imtihondan tanishlari yordamida oʻtkazib qoʻyishi evaziga 600 AQSH dollarini olgan vaqtida ashyoviy dalillar bilan ushlangan.

Mazkur holatlar yuzasidan Jinoyat kodeksining 168-moddasi (firibgarlik) va 28, 211-moddasi (pora berish) bilan jinoyat ishlari qoʻzgʻatilib, tergov harakatlari oʻtkazilmoqda.