Respublikamizda "Xavfsiz bolalik" tamoyili asosida bolalar ishtirokidagi yo‘l-transport hodisalarining oldini olish bo‘yicha keng ko‘lamli ishlar amalga oshirilmoqda.

Yo‘l harakati xavfsizligi xizmatida O‘zbekiston Respublikasi Oliy Majlisining bola huquqlari bo‘yicha vakili ishtirokida muhim uchrashuv bo‘lib o‘tdi. Uchrashuvning asosiy maqsadi – bolalarning yo‘llarda xavfsizligini ta’minlash masalalarini muhokama qilish bo‘ldi.

Yil boshidan buyon amalga oshirilgan ishlar to‘g‘risida ma’lumotlar berildi. Xususan, 10 770 ta maktabda 6,6 milliondan ortiq o‘quvchi tahsil olayotgani, "Xavfsiz bolalik" doirasida yuzlab svetoforlar, qavariq piyodalar o‘tish joylari, sun’iy notekisliklar va temir panjaralar o‘rnatilgani, shuningdek, 5150 ta maktabda YHQ o‘rgatish sinfxonalari tashkil qilingani va minglab maxsus darslar o‘tkazilgani ta’kidlandi.

Biroq amalga oshirilayotgan chora-tadbirlarga qaramasdan, bolalar ishtirokidagi yo‘l-transport hodisalari hali ham kun tartibida qolmoqda. Uchrashuvda ushbu muammolar sabablari muhokama qilinib, aniq takliflar berildi.

Bolalar xavfsizligini ta’minlashda mahalla yettiligining rolini kuchaytirish, targ‘ibot ishlarini kengaytirish va ota-onalarning mas’uliyatini oshirish lozimligini ta’kidladi. Shuningdek, yo‘llarda trotuarlar mavjud emasligiga e’tibor qaratilib, bu bo‘yicha mas’ul tashkilotlar bilan hamkorlikni kuchaytirish zarurligi aytildi.

Uchrashuv yakunida bolalar xavfsizligini ta’minlash – umumiy maqsad ekanligi ta’kidlanib, bu yo‘nalishdagi hamkorlikni yangi bosqichga olib chiqish bo‘yicha kelishuvga erishildi.