Yangi yil bayramiga tayyorgarlik holatini o‘rganish va fuqarolar uchun xavfsiz hamda qulay muhit yaratish orqali bayramona kayfiyatni shakllantirish maqsadida IIV JXD Yo‘l harakati xavfsizligi xizmati boshlig‘i polkovnik Sherzod Ibragimov rahbarligidagi ishchi guruh Navoiy viloyatiga tashrif buyurdi.

Tashrif davomida ishchi guruh dastlab yig‘ilish o‘tkazib, unda bajarilishi lozim bo‘lgan ishlar rejasini belgilab oldi. Har bir vazifa uchun aniq muddatlar belgilanib, mas’ul xodimlarga topshiriqlar berildi.

Shundan so‘ng, "Yangi yil archasi" o‘rnatilgan hududlar, bozorlar va bayram tadbirlari o‘tkaziladigan joylarda xavfsizlik choralari hamda narx-navolar holati ko‘rib chiqildi. Turli noxush holatlarning oldini olish uchun profilaktik tadbirlarni kuchaytirish rejalari ishlab chiqildi.

Shahar markazidagi "Islom Karimov" ko‘chasida joylashgan saylgohda o‘rganishlar amalga oshirildi. Bayram tadbirlari o‘tkaziladigan ko‘ngilochar maskanlarda xavfsizlik choralarining ta’minlanganligi, jamoat tartibini saqlash va yong‘in xavfsizligiga rioya qilinganligi tekshirildi.

Bayram munosabati bilan amalga oshirilayotgan ishlar tanqidiy ko‘rib chiqilib, aniqlangan kamchiliklar yuzasidan mas’ullarga tegishli ko‘rsatmalar berildi. Fuqarolar uchun xavfsiz va qulay sharoitlarni ta’minlash asosiy vazifa sifatida belgilab olindi.