Dastlabki manzil Nukus shahridagi Allaniyaz Qahramon mahallasida amalga oshirilayotgan infratuzilma loyihalari hamda mavjud sharoitlar joyida ko‘zdan kechirildi. O‘rganish jarayonida piyodalar va transport vositalari harakati xavfsizligini oshirish, svetofor va yo‘l belgilarini yangilash, piyodalar o‘tish joylarini aniq belgilash kabi masalalar muhokama qilindi.

Shuningdek, tashrif davomida Amudaryo tumani hududida fuqarolar uchun amalga oshirilayotgan infratuzilma ishlari ham ko‘zdan kechirildi. Qorao‘zak tumani hududidan o‘tuvchi A-380 avtomobil yo‘lining 753-kilometrda esa sinov tariqasida o‘rnatilgan, og‘ir vaznli yuk tashuvchi transport vositalarining hajm va vazn parametrlarini avtomatlashtirilgan tarzda nazorat qiluvchi elektron tarozi punkti bilan tanishildi. Ushbu tizim yuk ortiqchaligini aniqlash, yo‘l qoplamasini saqlash va harakat xavfsizligini ta’minlashda muhim ahamiyat kasb etadi.

YHXX rahbariyati mahalla yettiligi bilan uchrashib, fuqarolar murojaatlarini tingladi hamda joylarga chiqib muammolarni bevosita o‘rgandi. Mavjud kamchiliklarni joyida bartaraf etishga qaratilgan sa’y-harakatlar — fuqarolarning xavfsizligini oshirish, ularning kundalik hayotini qulayroq qilish yo‘lida qo‘yilgan muhim qadam bo‘ldi.

Mazkur tashrif va o‘rganishlar, nafaqat mavjud muammolarni hal etishga, balki kelgusida yo‘l harakati xavfsizligini yanada mustahkamlashga xizmat qiladi